Mutil gazte bat larri zauritu da Irungo festetan gertatutako
liskar batean
Ekainaren 30eko goizaldean izan zen jazoera, alardea hasi aurreko
orduetan
Arantxa Iraola / Donostia. - Hilaren 30eko goizaldean,
Irungo alardea hasi aurreko orduetan, liskar bat jazo zen Irunen,
eta horren ondorioz jasandako zauri larriengatik erietxera eraman
behar izan zuten Jon Mikel Pikabea, 19 urteko mutil gaztea. Ertzantzak,
zer gertatu zen argitzeko ikerketa bat hasi du. EHk, berriz, erasoa
alardearen inguruko gatazkarekin lotuta dagoela uste du eta bihar
prentsaurrekoa emango du hori salatzeko.
DONOSTIAKO Arantzazuko Amaren erietxean atzo Egunkaria-ri aditzera
eman ziotenez, bertan ingresatuta dago mutil gaztea. Esan zutenez
Zainketa Berezien Gela batean egin ditu hainbat ordu. «Baina gaur
ja atera egin dugu», azaldu zuten, «beste gela batera eraman dugu».
Izan
ere, ospitaleko iturriek aditzera eman zutenez, hobera egin du
bere osasun egoerak. Hala ere, buruan sortu zitzaion odolbildu
baten ondorioz une larriak igaro ditu mutil gazte irundarrak eta
ebakuntza bat egin behar izan diote.
Herrizaingo Saileko informazio iturriek atzo Egunkaria-ri aditzera
eman ziotenez, aipatu liskarraren berri atzo izan zuten beraiek,
eta ikerketa bat abian jarri zuten. «Jakin badakigu liskar bat
izan zela ekainaren 30eko goizaldean Irunen». Oraingoz, jazoeraren
inguruko xehetasun gehiago ezin dutela eman esan zuten, ordea.
«Izan ere, nahasia izan zen», azaldu zuten. «Soil-soilik esan
dezakegu diligentziak ireki ditugula oraintxe ordubete-edo horren
atzean zer dagoen argitzeko», esan zuten atzo eguerdian. Gainerakoan,
ordea, jazoeraren inguruan salaketarik ez dutela jaso esan zuten.
Irungo udaltzainek ere ekainaren 30eko goizaldean liskarren
bat jazo zela berretsi zuten atzo, baina oraindik ez dutela esku
artean informazio gehiegi.
Egunkaria-k jakin ahal izan duenez erasoa jazo zenean lagun
talde batekin zihoan Irungo Kontrakale kalean Jon Mikel Pikabea,
eta beste talde batekin izandako liskarraren ondorioz zauritu
zen. Antza, goizeko 05:30 eta 06:00ak bitartean gertatu zen liskarra,
alarde aurreko dianan.
Alardearen gatazka eta erasoa
Jon
Mikel Pikabea ezker abertzaleko kidea da eta erasoaren gaineko
informazioa biltzen jardun dute EHren bulegoan.
Talde
abertzaleko informazio iturriek atzo ilunabarrean azaldu zutenez,
ondorio argi bat atera dute. Hain juxtu, diotenez, «lotura zuzena»
du ekainaren 30eko liskarrak, alardearen inguruko gatazkarekin
emakumeak soldadu onartzen dituzte irundar batzuek eta kontra
daude beste asko. Mutil gazte irundarra emakumeak soldadu
gisa onartzen dituen alardearen aldekoa dela azaldu zuten atzo
EHko informazio iturriek, eta horregatik zauritu zutela. Horren
guztiaren berri emateko prentsaurrekoa emango dute bihar.
Irungo EHko zinegotzi Koldo Barrosek atzo esan zuenez Jon Mikel
Pikabearen familia jazoeraren inguruko informazioa biltzen ari
da eta salaketa jartzea aztertzen ari dira.