| |
|
ALARDE FUNDAZIOARI
Joan den irailaren 25eko Euskaldunon Egunkariaren azken orrialdeak Hondarribiko
Alarde Fundazioaren abokatua den jaun batekin gertatua agertzen du. Egunkariak
dioenaren arabera jaun honek Jaizkibel konpainiaren izenean bidalitako
gutun bat jaso zuen. Bertan, Alarde Fundazioari, Jaizkibel konpainia alardean
hartua izateko baimen eskea egiten zitzaion. Gutuna euskaraz idatzia zen.
Alarde Fundazioko ordezkari den jaun honek, ez non eta ez
han, turkieraz eta gaztelaniaz erantzun omen dio Jaizkibel konpainiari,
iaio asko egin ere, diotenez. Jaun honen eginak bi interpretazio izan
ditzake bakarrik, gure ustez: lehena, baikorra, hau guztia turkierarenganako
zaletasun neurrigabe baten seinale izatea, edozein gutun turkierazko itzulpen
batekin laguntzera bultzatzen duena. Bigarrena, iluna eta etsigarria benetan,
gizon honentzat euskara eta turkiera gauza bera direla, bata bezain bestea
arrotz eta baztergarri gure artean.
Bistan da, baikortasunerako motibu handirik ematen ez duen inguru honetan,
zeinen aldera egiten duen zuzendaritza honek. Jaun honentzat alferrik
da nonbait bere herrian milaka euskaldunez (ez turkiarrez) inguratua egotea,
herritar gehienek beren haurrentzat euskarazko (ez turkierazko) hezkuntza
aukeratzea, euskarazko komunikabideak (ikus-entzunezkoak eta idatzizkoak)
egunero kalakan aritzea, tarteka kalean euskarazko hitzak belarrira isurtzea
(ez, ordea, turkierazkoak), edota kale izenak euskara hertsian (ez turkiera
exotikoan) adieraziak egotea. Honen guztiaren gainetik, jaun honen begiek
irrist egiten dute zeinu arabikoz idatziriko urrutiko kazeta baten azalaren
gainetik bezala. Ez dakit zerk kezkatzen gaituen gehiago, jaun honen erdeinuari
darion beste garai bateko urrinak, ala gure hizkuntzaren prekarietatea
erakutsian uzten duen inozokeriak. Espero dugu Alarde Fundazioak behar
bezain gogor hartuko duela gertakari hau eta berriz ere gerta ez dadin
begiratuko. Horrekin batera, Irun Iruten elkarteak eta, emango genuke,
Irungo euskaldunek orohar, azalpen bat eskertuko lukete.
Esan gabe doa, idatzi honen azpian gure hizkuntzaren kontrako erasoari
erantzun nahia besterik ez dagoela Irun Iruten Euskara Elkarteak alarde
bietako bazkide eta laguntzaileak baititu.
IRUN IRUTEN EUSKARA ELKARTEKO ZUZENDARITZA BATZORDEA
Irun Iruten
<iruniruten@euskalnet.net>
|
|